Николовски: Заев во понеделник да си поднесе оставка и да одиме на избори

Потпретседателот на ВМРО-ДПМНЕ Александар Николовски во гостувањето во емисијата 10 минути на ТВ21 изјави дека очекува в понеделник премиерот Зоран Заев да си поднесе оставка и веднаш да се распишат избори. На новинарското прашање кој датум за избори за нив е прифатлив, Николовски одговори дека сто дена после понеделник е најприфатлив за одржување на избори, односно веднаш.

„Очекуваме веднаш да влеземе во процесот на техничка влада и според Уставот и законите, за 100 дена да се оди на предвремени парламентарни избори, “ изјави Николовски.

Според негопричината не е само ситуацијата со датумот за старт на преговорите со ЕУ, туку и поради неможноста да се спроведат реформите и како што вели, лошата економска состојба на граѓаните.

Лидерите на ЕУ се уште без договор за датум за преговори со Скопје и Тирана

Лидерите на Европската Унија се разотидоа околу два часот изутринава по долга вечер преговори за проширувањето, но без договор и без заклучоци ни за Скопје ни за Тирана.

Финскиот премиер Анти Рине, по самитот, за медиумите кусо порача дека се надева дека лидерите ќе се навратат на прашањето во текот на денешниот ден, но без гаранции. Разни национални делегации различно брифираат, додека едните се надеваат дека ќе се наврати ЕУ на проширувањето денеска, други тврдат дека нема политичка волја за тоа.

ЕУ требаше вчера, по две одлагања, да донесе „јасна и суштинска“ одлука за отпочнувањето на преговорите за членство со Северна Македонија и Албанија, согласно препораката на Европската Комисија и општиот консензус во ЕУ дека двете земји се подготвени за следниот чекор. Но, недостатокот од политичка волја надвладеа.

Повеќето земји членки ја обвинуваат „тврдоглавоста и кусогледоста“ на Франција кон Западниот Балкан. Претседателот Емануел Макрон одбива секаков напредок во проширувањето додека не се измени методологијата на преговарачкиот процес, реформа која може да трае со години и за која Париз не дава конкретни одговори како треба да изгледа.

Од друга страна, земји како Холандија и Данска не сакаат да започнат преговори со Албанија. Во Хаг тоа е став на парламентот, и владата смета дека не може да го игнорира гласот на пратениците. За Холандија зелено светло беше прифатливо единствено под услов да се одвојат двете земји.

Конечно, третата група, најбројната, се земјите кои сметаат дека преговорите треба да почнат со двете земји, иако повеќето од нив велат дека беа подготвени да прифатат да се оди напред само со Македонија доколку тоа биде прифатливо за Франција.

Франција меѓутоа не се согласи со оваа варијанта, додека нејасен остана ставот на Германија до крај, за која одредени делегации брифираа дека е „непопустливо“ против одвојувањето, други држави членки сметаа дека Париз и Берлин пак се кријат еден зад друг.

По неколку обиди за нацрт заклучоци, кон полноќ паднал француски предлог за компромис: да се одложи по четврти пат одлуката за пролетта 2020, пред самитот за Западен Балкан во Загреб. Опцијата била неприфатлива за повеќе земји кои сметаат дека не смее да има никакво одлагање, брифираат дипломатски извори, и дека одлуката „мора да се донесе денеска или утре“.

Поради ова земјите поддржувачи на проширувањето го одбиле францускиот предлог и одлучиле дека е „подобро да нема воопшто заклучоци отколку лоши заклучоци“, велат за МИА извори од земја членка на ЕУ.

-Западните земји едноставно не разбираат, има целосно отсуство на разбирање на реалноста надвор, подобро е што не се договоривме за текст, ова е навистина сериозно и сметаме дека е работа на претседателот Туск да стори нешто сега, додава дипломатски извор од источноевропска земја на ЕУ.

Самитот продолжува денеска од 9:30 часот, на дневен ред главна точка е повеќегодишната финансиска рамка на ЕУ, климатските промени и стратешката агенда на ЕУ, во присуство на идната претседателка на Европската Комисија, Урсула фон дер Лејн.

– Време за разговор има доколку има волја за тоа, само буџетот е тешка тема, другите се симболични…, заклучува изворот на МИА во разговор по самитот.

КОСТАДИНОВ: Опозицијата е во очај, СДСМ го трасира патот кон ЕУ, а јас се уште сум оптимист за датум

Изненаден сум од аматеризмот на опозициската (ВМРО)-ДПМНЕ, од немањето грам државност, политички сенс во време на најголема трпеливост на граѓанството, објави вечерва портпаролот и пратеник на СДСМ, Костадин Костадинов.

– Граѓаните тоа го препознаваат и соодветно политички ќе реагираат. Да се разбереме патот на интеграцијата го трасира СДСМ, (ВМРО) ДПМНЕ на секој можен начин се обиде да го уништи и не успеа. Направените реформи од владата на СДСМ никој не ги оспорува, напротив сите ги поддржаа. Јас сум се уште оптимист за процесот, но што и да се случи, совеста ми е мирна оти во ова време како одговорни политичари направивме се, за да бидеме во овој процес. Огромни се разликите. Ние сме на страната на прогресот, развојот, перспективата. (ВМРО)-ДПМНЕ е заглавено во обидите на секој можен начин дури и во такви важни моменти за државата, да си ги заштити криминалците во своите редови, играјки си со емоциите на граѓаните, објави Костадинов на Фејсбук.

Популарно